Diç l ditado popular, rei muorto – rei puosto i ye bien berdade. La bida cuntina i las fiestas tamien, nós ye que bamos mudando de sitio, porque nada acaba i nós tamien nun acabamos, bamos ye caminando i cumo ls caminantes, bamos quedando mais cansados i mais bielhos, mas chegaremos a algun sitio que será melhor ou pior cunsante l camino que scuolhirmos.
Ls mardomos bielhos
Ls mardomos nuobos
Mas l que amporta ye que ls mardomos de Santa Bárbela deste anho, acabórun l sou oufício i la fiesta corriu bien i al fin de la tarde antregórun l mando als mardomos de 2011, que cumo yá l HOIJE habie dito die 3, ampeçórun yá a trabalhar ne l die de l Festibal Antercéltico. Fui quando fumos mardomos que se ampeçou esta tradiçon de antregar la fiesta i parece que quedou para muitos anhos.
Ls anjicos
Na procisson, mardomos líeban l pálio
Na procisson yá ls nuobos mardomos ajudórun a lebar l palio i a anfeitar alguns anjicos que abrilhantórun la caminada que este anho fui por la rue de l Baiunco. La musica de Miranda acumpanhou a Santa Bárbela i a la antrega de la fiesta. Ye siempre buono ber que la fiesta de la Bila nun squece la banda de l cunceilho.
La banda de Miranda
L abraço de antrega de la fiesta
Ls nuobos mardomos apresentan-se al pobo
Ls nuobos mardomos, apuis de l sorteio de ls prémios de la fiesta, apresentórun-se al pobo i cumbídórun la giente a comer ls antramoços i las cabacas i a bober l bun bieno de la Cooperatiba , specialmente l branco, que fresquito, deixaba todo cunsolado a quien l bobie.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
