La antrega de prémios de l II Cuncurso de Binos de Trás-ls-Montes fui onte an Valpaços i mais ua beç l Praino stubo de parabienes porque cunseguiu dues medalhas de prata i ua de ouro. Las binhas nuobas ampéçan tamien a dar binos de buona culidade i para alhá de la medalha de ouro i de prata de la Cooperatiba , tamien l bino de José Preto ganhou ua medalha de prata.
L’ antrega de las medalhas fui ne l multi-usos de Valpaços
L júri de l cuncurso cuntou cun ls melhores einólogos de la region i de la zona de l Douro i cun credenciados jornalistas, diretores de rebistas de la specialidade i de cunfraries de ls binos. Presídio a la mesa l bice-presidente de la cámara de Valpaços i deilha fazíen tamien parte l Bice-Diretor Regional de la Agricultura i la Direçon de la CVRTM i stubírun presente ls Grã-mestres de las cunfraries CEGTMAD i CVT, bárias antidades de la region i muitos produtores-angarrafadores de bino.
L bice-presidente de la DRAPN antrega la medalha de ouro a la einóloga de la
Cooperatiba de Sendin
L presidente de l Cuseilho-Fiscal de la CVRTM antrega ua medalha de ouro al einólogo de “Vale-Pradinhos”
L representante de la DRAPN ne l çtrito de Bregáncia antrega ua medalha de prata a la einóloga de la Cooperatiba de Sendin
L Grã-Mestre de la CEGTMAD antrega ua medalha de prata a José Preto
Apuis de l’antrega de las medalhas houbo la proba de binos a que stubírun presentes bários jornalistas, telebisones i diretores de rebistas, assi cumo cumpradores de bino. Son estas einiciatibas que promóben la region i agora outras se seguirán ne l paiç i ne l stranjeiro para ancentibar la benda de binos.
Hai que star an todo lado, tanto an fiestas cumo a tratar de la region. I nós todo fazemos para lebar a todo mundo las amboras de l que se passa pul Praino.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
