La fiesta dedicou l die de 5ª. Feira als garoticos, l camboio de la Câmara andou toda la tarde i nuite pulas rues de Sendin, mas nun serbiu solo para andáren ls garoticos, ls maiores tamien nun se fazírun rogados i ala a andar de camboio, talbeç cun la sauidade de l camboio que mos tirórun.
Mas nun fui solo l camboio, tamien ls ansuflabes fúrun la alegrie de la pequenada i a la nuite anquanto ls moços i moças dançában al toque de l cunjunto, ls ninos saltában ou corríen puls bários ansuflabes que oucupában la abenida junto als bumbeiros.
Ls fuogos yá ampeçórun ne l Praino i junto a Lagoaça hai un que inda nun stá cuntrolado i ls nuossos bumbeiros stan tamien alhá a ajudáren ls de Mogadouro, para eilhes la fiesta ye outra i l fuogo tamien, alhi nun stróuran foguetes, l stralhar que se oube ye l barulho de las árboles a arder.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
