Acabou yá na madrugada de l die 4 l torneio de futebol de cinco de las maltas de Sendin. Todos ls anhos por alturas de la fiesta de Santa Barbela, las maltas de ls bários anhos fázen un torneio de futebol de cinco, para cumbibio i pássan dous dies de fiesta ne l campo de la bola de l Grupo Çportibo de Sendin, que colabora na ourganizaçon, que pertence a la malta que faç 20 anhos ne l prócimo anho.
Nun falta de comer i bober, mas l HOIJE solo fui a la nuite de l die 3 i son dessa altura ls retratos. Las maltas son de ls nacidos ne l mesmo anho i habie maltas, que lebában yá las mulheres i ls filhos a ber, fui anteressante ber maltas a jogar cun çfréncias de eidades de mais de 10 anhos. Ganhou l torneio la malta de 1991, ourganizadora de l torneio deste anho.
Tamien houbo mais ua sposiçon de pintura – “divagações do olhar” , na Casa de la Cultura de Sendin, que bai a star esta sumana al público. L pintor ye Luís Raposo, macido an Fuonte Aldé, mas filho de un sendinés. Dessa sposiçon son ls retratos que bos amostramos.
Na nuite de l die 3 houbo las tunas na Praça i arraial i na nuite de l die 4 fui la atuaçon de ls Pica Tomillo , que inda stan a esta hora a tocar.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
