De 13 a 22 de Agosto rializa-se an Miranda de l Douro mais ua eidiçon de la Famidouro – Feira de Artesanato i Multiatebidades. Astanho l'eibento cunta cula persencia de 80 spositores i cun muita animaçon de rue. Esta ye ua eniciatiba de la Associaçon Comercial i Andustrial de Miranda de l Douro cul apoio de la Cámara Municipal.
Ne l próssimo die 21 de Agosto rialízan-se mais uas “Cumbersas an Mirandés” sob l tema: l mirandés na era digital , este eibento stá anserido ne l III Ancuontro de Blogueres mirandeses, adonde anualmente se ajúntan alguas dezenas de studiosos que cumpartílhan alguas eideias, oupeniones i sugestones subre la segunda léngua oufecial de Pertual ne ls tiempos modernos, l mesmo será dezir na era digital. Puode partecipar quien quejir.
Atanor - Comemoraçon de l “Die de l Sócio” cun atebidades tol die 14 de Agosto, alrededor de la sede, çportos radicales, jogos tradecionales i jantar cumbíbio a las 20h30n (Org: Associaçon Cultural i Çportiba de Atanor).
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
