Ne ls dies 13,14 i 15 de Agosto realiza-se la 10ª. Feira Agro-Alimentar, an Trabanca, bien acerquita de nós, de l lado de alhá de l riu Douro, ye ua feira de pordutos de la tierra i l bino, l’azeite i l miel son ls mais amportantes. La CORANE ten un sitio para sposiçones de ls pordutos de la Tierra Frie Trasmontana i la Cooperatiba de Sendin ten un sitio para bender todos esses pordutos.
La antrada de la Feira
Muita giente na Feira
Nun ye l mar! Ye la barraige de Almendra junto a Trabanca
Cumo la Cooperatiba faç parte de la direçon de la CORANE , ye la Cooperatiba de Sendin que assegura l funcionamento de ls dous sítios. Fumos alhá ne l die de la abertura i yá ancuntremos sendineses junto a las barracas. Ye promobendo ls nuossos pordutos, tanto an Pertual cumo ne l stranjeiro que se tornan coincidos i se promobe la sue benda.
L sitio de la Cooperatiba
L sitio de la CORANE
Stában a dezir que podie star melhor... ls sendineses quíeren siempre mais, mas hai que ajudar a quien faç...
Para que la Feira seia bejitada por muita giente, la ourganizaçon faç bárias atibidades i ne l die 13 houbo ua Demostraçon Equestre “Cultura de l Galope”: doma baqueira, clássica i spetáclo de sebilhanas. Centenas de pessonas passórun por la Feira ne l purmeiro die, mas ne ls dies 14 haberá eisebiçon de parapentes i die 15 proba comentada de azeites.
Fumos a ber se todo staba bien...i staba...
Galerie de binos
Mas l mais amportante ye la galerie de ls binos que stá abierta tols dies i por 1 euro puoden-se porbar ls binos an sposiçon, que son 200, dez ls brancos, rosés i tintos als binos doces i als spumantes. Podeis beber zde que nun téngades que cunduzir lougo a seguir ou se nun tubirdes algua malina acontra.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
