L Bispo de la nuossa diocese bejitou Sendin para presidir a la cunfirmaçon de cerca de 50 pessonas nua cerimónia que ajuntou muita giente na Praça de Sendin adonde se realizou la missa mesmo delantre de la eigreija. Nun son muitas las bezes que un Bispo bejita ua tierra porque son muitas las poboaçones i por esso l HOIJE registrou la bejita, tanto an retratos cumo an bideo para quedar cumo decumento feturo.
La bejita tubo tamien un motibo special porque fui ua forma de recoincer l trabalho de l Pe. Silba que ye pároco de sendin zde que morriu l Pe. Francisco, mas que faç en 2010, 50 anhos que fui ourdenado padre. L HOIJE deixa eiqui tamien ua mensage de apreço i que cuntine a trabalhar por muitos mais anhos ne ls montes de l Senhor.
Nestas bejitas queda siempre ua mensage para todos i l Bispo deixou alguas, mas hai ua que queremos registrar: Ls cristianos, cumo ua familhia, dében ajuntar-se a comer i la missa ye la representaçon de la “CENA” a que todos somos chamados a cada Demingo, mas ye durante la sumana que debemos cumportar-mos cumo familhia para la “ CENA ” tener sentido.
La Praça i la rue de Camino Prado stában angalanadas cumo podeis ber, l que amostra que Sendin sabe recebir bien a quien mos bejita, parabienes a las freiras i a quien las ajudou a porparar todo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
