Cumo acuntece tols anhos ne l més d’Agosto, la Associaçon faç un die dedicado a todos ls associados, cun jogos tradicionales, atibidades para ls mais nuobos i ua cena para toda la giente de l lugar. Ye un modo de ajuntar a todos, eimigrantes i residentes que culs associados fázen ua familhia.
Este anho houbo ansuflabes para ls ninos i dues moto-quatro eilétricas para todos se podéren dibertir. Muitos eimigrantes bénen d’aprepósito para stáren culs sous. Esta associaçon ten muitos associados de las aldés alrededor i neste die nun fáltan para cumbibíren culs amigos que muitas bezes solo béien neste die.
L cochino assado anteiro a rodar ne l speto fui un de ls quemeres de la cena, mas todo l resto staba tamien bien i hai que dar ls parabienes a la cozineira. Por todas las aldés hai associaçones que dinamízan las sues tierras i esso si que ye amportante.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
