Yá onte bos habiemos amostrado ls retratos i dado la ambora de la bejita de l Bispo de la nuossa diocese, mas tamien fazimos un bideo cun alguns momentos de la bejita i ye esse bideo que bos amostramos. Nun tenemos muitos meios i inda menos apoios, mas fazemos l que podemos para bos dar las amboras de l que se passa an sendin i ne l Praino.
Ls crestianos sendineses soubírun recebir l sou Bispo, que bien merece l carino de todos, porque ye ua de las mais puras i buonas outridades de la eigreija pertuesa. Las sues sábias palabras, sien beidade nin arrogáncia, serenas i de un berdadeiro pastor, quedarán a resonar na Praça de Sendin, que todos las saiben oubir porque será la melhor houmenage que l podemos fazer.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
