Porque asistimos a ua berdadeira tarde cultural por todo l que eilha mos dou, queremos repartir cun todos bós l que fui la tarde de la fiesta de Prado Gaton. Assistir a un spetáclo nua casa de triato ou nun palco, nun ye la mesma cousa que ber i oubir al bibo; ne l meio de la giente de l Pobo, ricos i probes, nuobos i bielhos; ls pauliteiros i las danças mistas de la nuossa tradiçon – la tradiçon de l Praino.
Mas para quei muitas palabras se l bideo amostra todo. La quaije totalidade de l pobo de Prado Gaton i muita giente de ls alredrores assi cumo turistas que tubírun la suorte de assistir al que poucos ténen la ouportunidade de ber i oubir - ls pauliteiros i las danças mistas ne l Praino -. Parecie que stabamos ne ls anhos 50 de l seclo passado, pauliteiros i danças de Miranda ténen que se bibir eiqui ne l meio de la giente. Até la musica parece outra, las quelores de ls trajes, l cielo sien fumo nien nubres, la calor de la giente que fazie squecer la calor deste cálido Berano, hai que ls sentir i ls bibir.
Porque mos pedírun durante la sumana poneremos ls retratos.
Para quien quejir, manhana haberá outra atuaçon an Atanor, se andais pul Praino ou sabeis de quien ande de bacanças porqui, dai-le la nuoba porque bale la pena. Nós registramos para lembráncia fetura.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
