L fuogo chegou al Praino i las arribas de l Douro ne l termo de Sendin ampeçórun a arder, yeran por ende las dues de la tarde, l HOIJE porcurou lougo l melhor sitio para registrar todo i dar-bos las eimages i baliu la pena porque assistimos a un trabalho purfeito de colaboraçon antre pertueses i spanholes.
L fuogo ampeçou nas arribas pal lados de l Risco, an Sendin i quaisque al mesmo tiempo ne l termo de Penilha(Spanha). Ls bumbeiros de Sendin debrebe chegórun, mas l sitio era de mui defícele aceso i houbo que cuntrolar l fuogo para nun fazer grandes stragos. Ls helis de Castielha-Leon, lougo aparecírun i l fuogo de l lado de Spanha durou pouco.
Para cumbater l fuogo, ls helis spanholes íban abastecer-se de auga a la barraige de Almendra que queda mesmo acerquita de Penilha i lougo que acabórun cul fuogo benírun ajudar ls bumbeiros de Sendin. Purmeiro aterrórun i apresentórun-se al comando de Sendin, cun dues eiquipas de sapadores i apuis passórun a botar auga an riba de las labaredas, que an pouco tiempo deixórun de ser preacupaçon.
Fui anteressante ber la coordenaçon de ls bumbeiros de sendin que lougo anformórun ls helis para íren a sacar l’auga a un tanque junto al Picon de ls Arteiros, que pertence a la famílhia de Belmiro Carçon, porque quedaba mesmo junto al fuogo. Tamien ye de loubar l’hablidade de ls pilotos que debrebe soubírun ir al tanque a tirar l’auga.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
