Tols anhos ne l més de Agosto la feira de Palaçuolo ye cunsiderada “feira anual” porque era neste més de l anho que se fazíen las melhores feiras de l lugar i tornou-se tradiçon porque fui antegrada nas atibidades de la fiesta de l die dous de Setembre an honra de Nossa Senhora de l Resairo. Esta ye ua feira popular i hai siempre muitas atibidades, cumo la gincana de burros i la dança de ls pauliteiros, an que púoden partecipar todos ls antigos dançadores de Palaçuolo i quien saba dançar.
Las feiras yá nun son l que éran porque las deficuldades de la bida ban altarando l modo de bibir i mesmo la cultura Ouropeia bai ne l pior sentido, porque bai dando mais balor al denheiro, que nun hai, que a la giente. La alegrie de outros tiempos bai zaparecendo de las caras i ls cumprimentos de amizade que se bien antre la giente de todos ls pobos bai sendo sustituida por la çcunfiança.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
