APUIS DE MESES SIEN CHOBER…
Apuis de mais de cinco meses sien chober, caiu auga ne l Praino, nuns lados bien chobida i que falta fazie, mas noutros las troniadas fúrun grandes i fazírun alguns stragos i einundaçones percipalmente nas poboaçones, ls ribeiros i ls caminos nun sofrírun muito porque staba todo tan seco que l’auga fui-se sumindo puls terrenos ressequidos.
Stabamos an Mogadouro quando caiu la troniada na bila i podimos ber la fuorça cun que caie l granizo i la chuba. Fui tanta que einundou comércios, garages i habitaçones, tenendo ls bumbeiros sido chamados a baler an muitas situaçones i passadas dues horas inda trabalhában para las resolber todas.
Segundo dixo l comandante de ls bumbeiros, stában dues dezenas de bumbeiros ne l terreno apoiados por cinco biaturas i motobombas. Mas noutras tierras las troniadas fúrun grandes, tenendo caído ua al fin de la tarde an Sendin i Atanor que inda fizo tremer la giente, mas nun houbo grandes stragos nas poboaçones, mas muitas culturas quedórun arrasadas.
La chuba tamien fui buona para las ubas i las azeitunas, por esso nien todo ye malo. Yá quedou la tierra buona para sembrar las nabiças i siempre poupa algun trabalho a regar las huortas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
