Ye hoije la fiesta de la Senhora de l Resáiro an Palaçuolo, mas zde l die 27 que hai atibidades, sendo hoije l die dedicado a la parte religiosa, cun missa i procisson i cumo nun podie deixar de acuntecer, ls foguetes i la banda de musica, que cada beç mais se bai deixando de oubir puls pobos, mas ls mardomos quejírun dar a la giente un cuncerto cun las bandas.
Para alhá de la feira de l die 27, que yá eiqui fui ambora, i onde nun faltou la chicha assada, houbo ua gincana de burros para ninos i giente grande, que tubo la partecipaçon de la AEPGA (Associaçon de gado asinino) cun sede an Atanor i que animou bielhos i nuobos.
Ls pauliteiros fazírun tamien la sue parte, cun danças bien apresentadas, nun fússe l grupo de Palaçuolo un de ls melhores de tierras de Miranda. Poucos grupos apreséntan las sues danças, dançando culs pies i tocando las castanhuolas, pus ye un regalo ber l acerto de ls pauliteiros de Palaçuolo.
Manhana bamos apresentar-bos un lhaço, mas yá bos abisamos que esta tarde de dança, fui mais para la giente de la tierra i cumo d’atrás, quando nien todos teníen roupa de pauliteiro, mas mesmo assi i todo dançában, tamien ls ides ber dançar bestidos cumo quiera i cun jaleco i chapéu amprestados.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
