VIII Eidiçon de la feira de burros ne l Naso
Ye manhana la VIII eidiçon de la feira de burros ne l Naso, ua realizaçon de la mardomie de Nuossa Senhora de l Naso, La Câmara Munecipal de Miranda i la associaçon de burros AEPGA, que bai a ser un acuntecimiento mui amportante para la mostra de la raça asinina de Miranda i al miesmo tiempo tornará esta feira de biesperas de la fiesta de Nuossa Senhora, la maior de l anho.
Esta ye de las redadeiras fiestas de Berano i tamien la que ajunta mais giente ne l Praino. D’atrás era la fiesta na que ls sendineses éran mui percurados porque lebában ls fi(g)os (figues), las ubas i ls pomientos, mas percipalmente las berças de l Natal, para ls de las aldés de la raia ponéren.
Éran muitas las pormessas a Nuossa senhora i na procisson bíen-se las ties çcalças ou cun ua saca de pan a las cuostas a acumpanhar l’andor. La Santa iba bien cargada d’ouro que fui amelhando durante anhos. L fuogo era de ls melhores spetáclos de Berano i quaige siempre acababa culs campos alredror a arder, mas nunca iba mui loinje.
Moços i moças aporbeitában l derradeiro arraial para arranjar cumpanha, que este anho todo cuorra bien i que ls mirandeses que podíren, que nun déixen morrer la tradiçon.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
