Ls presidentes de Aranda i Miranda, cumo bos amostremos onte, dórun un abraço arrochado antre ls dous municípios, Aranda de Duero i Miranda de l Douro, mas la eiquenomie tamien stubo bien representada pula Cooperatiba Ribadouro i la cultura puls pauliteiros de Malhadas i l Rancho de ls porsores.
Fui un die de fiesta, l die de Miranda an Aranda, las outridades fazírun las honras de l die i ls pauliteiros lhebórun la cultura ne l die dedicado a Miranda, mas la Cooperatiba stubo na FIDUERO (feira de las fiestas de Duero) durante ls dies que durou la feira, pormobendo ls binos de l Praino i soubo recebir bien a todos.
Las outridades tamien soubírun agradecer a la nuossa Adega i fui alhi que probórun ls nuossos binos, que muito apreciórun i fui cun afeto que dórun ls parabienes a Bitor Ferreira que nesses dies representou la Cooperatiba. Tamien fui delantre de l stande de la Cooperatiba que dançórun ls pauliteiros.
Ye assi que se faç andar la bida, dando las manos las percipales fuorças de l Praino serán l motor de ua nuoba strada camino a un Praino melhor i mais rico.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
