ONTE EN ARANDA
Las mais altas outoridades de Miranda de l Douro i Aranda de Duero manifestórun la sue firme antençon de rebitalizar la geminaçon assinada an 1984 antre las dues cidades ligadas al riu Douro i qu'al largo destes 26 anhos fúrun tiempos d'altos i baixos.
L persidente de la Cámara Municipal de Miranda, Artur Nunes i l alcalde de Aranda, Luis Briones, durante l'eibento oufecial ourganizado para celebrar l Die de Miranda de l Douro amostrórun antresse an mantener esses laços fraternales i dáren un nuobo ampulso para l'abertura de nuobas formas que ban para alhá de l solo antercámbio cultural. Nesse sentido, Artur Nunes anformou que l sou munecípio ten ua comisson para splorar nuobos caminos que poderíen alargar essa relaçon, mostrando special antresse pa la sfera eiquenómica, mas sin squecer la base social. "Debemos ampeçar hoije un nuobo porjeto, ua nuoba dinámica, Aranda puode cuntar cun nós, que somos la puorta d'antrada para Pertual", dixe el.
Nua cerimónia comobente, mas nó de nostalgie i pa l reconhecimiento de ls percipales motores de l’heirmamiento persentes, Júlio Meirinhos, Leonisa Ull, Rafael de las Heiras i Fernado Subtil, Luís Briones dixo: " este ye un streitamiento de ls laços d'amizade depuis dun tiempo de relaxamiento nas relaçones, hai que rebitalizar, nó solo an bejitas anstitucionales i nua celebraçon anual, porque hai inda un hourizonte quemun para para alhá de todo esso". Hai que partelhar spriéncias, promober l turismo antre las dues cidades cumo un amportante pedamiego de la sue eiquenomie, mantendo l porgrama “Cunheça sou bezino", que tenemos zambuolbido zde 2001, porque astanho yá bejitórun la cidade lusa alunos de l'ansino Claret i Castielha, i reconheciu que l percipal porblema nun resolbido ye la daprendizaige de l Pertués.
L die ampeçou cun ua recepçon na Cámara Municipal, adonde la Banda Municipal tocou ls hinos de Pertual, Spanha, Ouropa i çcursos passados, atuórun la Scuola Municipal de Folclore de Aranda i ls pauliterios mirandeses. Mais tarde, la delegaçon besitou la Fiduero , adonde las atuaçones folclóricas fúrun repetidas. Nesta feira stubo la Cooperatiba Ribadouro de Sendin cul sou stande de binos que cada beç son mais apreciados pul mundo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
