La dança, cumo todo na bida, tamien ten que ser tema de houmor, porque sien risa la bida era mui cumplicada de se bibir, inda que haba giente que ye pouco de risas cumo se fusse tan amportante que nada mais queilha fusse neçaira ou eisistisse neste mundo. Dízen ls antendidos que para rir son precisos muito menos musclos i sfuorço que para andar cun mala cara ou mal ancarado. Tamien stá probado que rir ye l melhor remédio. Pus ls pauliteiros de Palaçuolo dórun a toda la giente que stubo na fiesta, remédios para todo l’anho i cunseguírun fazer antrar na fiesta de la dança, bielhos i nuobos, moços i moças.
La dança antes de ser ua arte “para anglés ber”, fui dança popular, an que antraba todo mundo i se nun habie gaita, cantaba-se i se la roupa nun era aporpiada, ponie-se un chapéu na cabeça i un jaleco ne ls ombros i ala a dançar. Tamien ne l die de feira assi acunteciu an Palaçuolo i ye desse die l bideo que bos ponemos hoije. Podeis ber la alegrie de ls ninos i la giente a amostrar que sabíen ls lhaços de cor. Que melhor númaro de houmor poderíen apresentar a la giente? Apreciai bien, mas las buoltas de l lhaço stan bien besibles tamien, assi cumo la musica que l ninos tan bien tocórun.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
