Cuntínan las obras nas barraiges de l Douro Anternacional para oumentar la porduçon de einergie, obras que se bénen fazendo hai bários anhos i que inda irán a cuntinar mais alguns, purmeiro an Miranda de l Douro i agora an Picuote i Bemposta. Yá eiqui bos demos alguas amboras de las obras debaixo de tierra i de ls cuidados cula siguráncia, mas agora deixamos-bos las eimages de l riu neste die.
Houbo necidade de aporbeitar l tiempo de menos auga ne l riu para armazenar l’auga antes de Miranda l que fizo descer l nible de l’auga quaije para l nible de l riu antes de la costruçon de las barraiges i ye un spetáclo que solo se poderá ber poucas bezes i haberá giente que nunca l poderá ber, mas l HOIJE eiqui stá para bos l’amostrar.
Junto al riu antre Sendin i Fermoselhe habia la caseta de la guarda fiscal, que yá anhos staba cobierta pul’auga, mas agora puode ber-se bien l que resta deilha. L riu deciu muito i agora podeis fazer eideia de l que era antes de la costruçon de la barraige de Bemposta. L termo staba cultibado mesmo até a la borda d’auga, inda son besibles ls pardones de las oulibeiras.
Tamien ye possible ber l cachon de l Corço i l sitio mais streito de l riu por adonde se passaba l ganado para Spanha. Lougo por la manhana ye un cunsolo oubir l’auga de la cachoneira, parece que stamos ne ls anhos cinquenta de l séclo passado, quien podir debe ir a ber.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
