L Praino ten este nome porque esta region de Trás-ls-Montes ye mesmo praina i ten buonas cundiçones para la criaçon de bacas, l que faç falta ye ajuntar las tierras para que seia mais fácele i rentáble la criaçon de ls animales. Hai bários modos de se cunseguir esso, mas ten que haber ua politica agrícola cunsistente para la region, nun podemos star a poner floresta nun die, binha noutro, almendreiras noutro i oulibeiras quando mos parece.
La agricultura ten que ser racionalizada i cada cousa ne l sou lugar i nó adonde queremos, solo porque mos dan sucidio para l fazermos. Todos son libres de fazer la agricultura que quejíren, mas cun sucidios de l denheiro de todos, solo debe ser permitida cunsante l’anteresse giral.
L HOIJE andou pulas tierras antre Dues Eigreijas, Augas Bibas, San Pedro i Bilar Seco i puodo ber cumo yá hai buonas sploraçones i son estes agricultores que dében ser apoiados. Tamien yá eiqui bos amostremos outros sítios de binhas nuobas l que amostra que hai quien querga fazer, falta agora que las pessonas tómen cuncéncia destas realidades para nun se deixáren anganhar puls que nada fázen i solo sáben dezir que bai acabar todo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
