Inda nun se sabe se l IC5 bai a cuntinar até Spanha ou se passará cumo a la linha de l camboio, que chegou a Dues Eigreijas, parou para ber cumo habie de ser i yá acabou la linha i nunca dalhi passou. Pus parece que l IC5 lhieba l mesmo camino, queremos ser mais Ouropa, mas nestas cousas que son l mais amportante, que son las ligaçones antre ls paízes cada un defende la sue capielha.
An Dues Eigreijas las obras parécen de ua berdadeira outostrada cumo podeis ber puls retratos, mas hai que acumpanhar l que se stá a fazer, para nun quedáren sítios peligrosos i nun penseis que por todo tener sido bien studado que nun hai defeitos, nada ye porfeito i hai que pensar ne l que acuntece culas outostradas cumo la A 25 adonde inda aparécen porblemas tols dies.
Hoije yá nun hai deficuldades an eibitar ciertas curbas ou lombas por esso nada justefica que nalguns sítios l traçado quede mal, mas tamien nós todos tenemos la culpa por nun alertar antes de acabadas las obras. Por nós bamos a porcurar star atentos, que cada un que tenga algun reparo a fazer l faga quanto antes.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
