Mogadouro apostou nua zona andustrial i hoije bemos yá alhi muitas ampresas, a amostrar que l Praino se bai zambuolbendo i que hai muita giente que debe de ser apoiada i nó porjetos sien sentido ou de amigos. Uns fálan an que ye preciso fazer, mas ban quedando para trás anquanto outros fázen.
L HOIJE parece que ancomoda muita giente quando dá estas amboras, mas solo debe ancomodar-se quien nada faç ou pon trabones a quien quier fazer, mas un tiempo nuobo stá a la puorta, estes que se cúiden, para nun tenéren que dar cuontas públicas de l mal que fázen.
Quanta giente ten coincimento que esto eisiste? Pus bai sendo tiempo de amostrar l que se faç de buono, porque de zgrácias yá bamos fartos. Son muitos terrenos que se cunseguírun para fazer la zona andustrial, porque la giente apostou i colaborou, tamien apostou na sue Cooperatiba i alhi stá tamien.
L IC5 puode ser ua aposta para nuobas realidades, mas hai que pensar mais ne l’antresse de todos, que ne l antresse andebidual. Hai que fazer las cousas para todos i que deilhas todos téngan coincimento. Solo ándan scundidos ls que por mal ándan.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
