L Praino ye ua de las regiones cun mais linhas de alta tenson i de mui alta tenson, por bias de las barraiges de l Douro anternacional, que ten trés de las maiores barraiges pertuesas ne l sou termo, Miranda de l Douro, Barrocl de l Douro, mais coincida por Picuote i Bemposta.
Ls trabalhos de aumento de la poténcia de las barraiges, obras que se stan fazendo i que, nun tiempo de crise, muito ténen ajudado a mantener ls puostos de trabalho i até oumentar-los ne l cunceilhos de Miranda i Mogadouro. Mas siempre que hai obras hai porblemas cul l’ambiente i para las pessonas.
Las pessonas béien ls sous modos de bida altarados, mas se nuns causos ye malo, tamien noutros béien melhorar las sues cundiçones de bida. L’ambiente ye que acaba siempre por sofrer mais i las linhas de alta tenson que se stan a poner pul termo, son un de ls piores males para la paisaige i la bida salbaige.
Fumos ber ls trabalhos, son deilhes ls retratos d’hoije. Sabemos bien la deficuldade de sustituir las linhas, tanto por bias de l custo, cumo por nun haber inda studos que garántan ua melhor soluçon, mas hai algo que podemos i debemos eisegir, que ye sermos cumpensados puls prejuízos na paisaige i na bida de la giente, plantas i animales.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
