Ende stá ua frase que puode serbir para dues amboras, ua para amostrar las cousas buonas que porqui podemos ancuntrar i outra para falar de l miel i de las abeilhas que ne l Douro Anternacional trabálhan sien paraige, para mos anchíren la casa de miel, esto para ls que se dedícan a tratar deilhas.
ls fabos de miel
Yá bos amostremos ls sítios adonde hai colmenas i la paisage guapa, por adonde las abeilhas bólan a saber de l pólen, para fazéren l miel, mas hoije bamos dar-bos amboras de la Associaçon de l Miel, cun sede an Mogadouro i que ajuda ls associados a tratar de las colmenas i a tirar l miel.
centrifugadora
Na direçon stan dous sendineses i l téquenico respunsáble ye de Sendin i fui cun eilhes que acumpanhemos l trabalho de tirar l miel. Ls retratos amóstran ls bários passos que hai que dar i ls artimanhos que son precisos. Cada beç mais, tratar de abeilhas ye mais rentáble i puode ser ua atibidade de feturo, para quien quérga arranjar l sou próprio amprego.
Ne l Douro Anternacional yá se pordúzen toneladas de miel que ye mui apreciado por toda la Ouropa i ne l Japon i Stados Ounidos. Mas tamien la cera i l pólen son ua riqueza an crecimento. La Direçon Regional de Agricultura stá antressada an apoiar la atibidade, mas tenerá que cuntar an purmeiro lugar culas Associaçones locales i nó culs políticos, que solo pénsan ne ls sous partidos.
depósitos
a las bezes acuntécen estas cousas
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
