Mais ua beç las obras de l IC5 son ambora ne l HOIJE, mas desta beç porque se tornórun nun porblema para la populaçon de Sendin. Nun fui por nun habermos falado eiqui que ls porblemas aparécen, mas porque pouca giente fizo causo i inda mais, porque las pessonas nun son debidamente anformadas.
L camino que bai para Peinhas Cabalho, chegaba a la Cruç de l Raio i al chegar a la antiga Strada Romana, andados poucos metros para la dreita, ancuntraba l camino para la Malhada , bielho camino para Trabanca. Agora parece que para seguir pul camino para la Malhada , hai que ir a la Staçon , ou a la Cruç de Braço Quebrado, para alhá de Cabeça Lubreira.
Todo poderie tener sido resolbido cun ua passaige para pessonas e pequeinhos meios de trasporte. Nun poderie ser adonde se ancóntran hoije las ancruzelhadas de ls caminos, mas podie i puode, poucos metros para la squierda, adonde l terreno dá l znible neçairo. Todo se poderá resolber, mas nun se puode deixar andar, porque las obras nun púoden parar.
Quando ua pessona quier fazer las cousas eilha sola, sien que todo mundo tenga cincimento de l que se passa, dá este resultado. L tiempo de andar cun las cousas scundidas, yá eiqui fui dito mais que ua beç, solo dá malos resultados. Salazar ye que dezie: “ourgulhosamente solos”.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
