Ampeçou onte la bendimia para la Cooperatiba que abriu a las 10h. L HOIJE stubo alhá i registrou la antrada de ls purmeiros tratores cun ubas. Por aqueilho que bimos hai ua grande çfrença antre las ubas de uas binhas i de outras, porque cumo fui un anho de pouca chuba i eirregular, uas passórun mais sede que outras.
Hai binhas cun ubas de eicelente culidade, mas outras nun chegórun a criar bien las ubas i la maturaçon tamien inda nun ye la melhor. Mas nun bai a ser fácele cuntrolar bien la bendimia de modo a fazer binos de alta culidade, porque la falta de giente i de çponiblidade de las pessonas nun bai a facelitar l trabalho.
Tamien hai outro porblema para la Cooperatiba , que ye l de haber muito mais ubas brancas que tintas. Fui un anho buono para las brancas, mas nun ye l bino que mais se bende. La graduaçon ne l giral parece que ye buona, agora speramos por binos de culidade.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
