La eigreija de Sendin ye hoije, ambora por buonas i malas rezones i ye tema de cumbersa pulas rues i puls cafés. L HOIJE cumo local de nuobas de l Praino, trai tamien las amboras para todo mundo saber. Son las obras de la eigreija i l roubo de l ouro de Nuossa senhora.
La ambora buona ye que fúrun acabadas las obras de l telhado, que agora ye todo nuobo, bien precisaba, mas para esso muito ten cuntribuido l’ajuda de ls cristianos sendineses, que ban amealhando durante l anho, para las necidades de la sue paróquia. Mas hai un porblema que ten que ser resolbido, que ye l denheiro de las fiestas. Ls mardomos, acabado l sou mandato, nun púoden cuntinar a tener l denheiro a la sue orde, durante anhos i anhos.
Roubórun l ouro que Nuossa Senhora tenie puosto, nun bamos a çcutir se deberie star ou nó puosto na eimage, ou se ye buono ou malo ls santos ousáren ouro, cuido que stamos nun paiç libre i drento de sue casa, son ls duonhos que sáben, agora naide ten l dreito de antrar nua casa i lhebar l que nun le pertenece.
La sociadade chegou a esto, nun hai respeito puls outros i la ganáncia chega a puonto de l ouro i l denheiro séren ls santos de muita giente. Hai que star begilantes i nun debemos cunfundir democracie, cun deixar cada un fazer l que quier. Ser buono nun ye tener miedo de ls outros, ou ser cumo las oubeilhas, tamien ye saber lutar pula sociadade que ye de todos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
