La feira de l azeite i de la caça an Peredo fui un eibento amportante de l Nordeste i son de lembrar eiqui las palabras de l secretairo de stado de la agricultura i pescas, que dixo que ye amportante tratar de las tierras de floresta, porque estas son un de ls melhores meios de perserbar l’ambiente i de porteger l terreno acontra las anchenas.
La Cámara de Mogadouro, segundo dixo l sou presidente, ten las cuntas debidamente cuntroladas i puode assigurar ls pagamentos als fornecedores drento de quinze dies i segundo el, se l stado pagasse l que l debe a la cámara, poderie tener 1 000 000 de euros a la orde para poder gastar.
Tamien son amboras ls porjetos de trés cozinas regionales, que la cámara de Mogadouro bai a apoiar na zona andustrial i que ban a criar 30 puostos de trabalho i l porjeto trásfrunteiriço para la recuperaºçon de eigreijas románicas de ls dous lados de la raia. Ne l Praino ban a ser recuperadas las eigreijas de Algosinho ne l cunceilho de Mogadouro i la de Malhadas ne l cunceilho de Miranda.
Ua fuorte sploson fizo dous fridos, un deilhes cun grabidade nua oufecina na Miranda i segundo un de ls fridos, Paulo Cristal, “la sploson fui grande, parecie un filme, l miu ampregado saliu a correr, de la oufecina i culas roupas a arder” , mas nun puodo dezir cumo acunteciu.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
