La proba de binos stramuntano-dourienses e galhegos que se fizo an Chaves, ourganizada pula CEGTMAD i que cuntou cun la Cunfrarie dels Spumantes de Pertual e de la Cunfrarie de ls Binos Galhegos, fui animada puls Gaiteiros de Sendin, que fazírun tamien la arruada pulas rues de Chaves, zde l Ouditório de l GATAT, ne l Jardin de l Bacalhau, até a la Dega de l Faustino. Muita giente paraba para ber ls cunfrades i ls irmandiños i oubir la gaita tocada por Dinis Arribas, acumpanhado por tiu Ângelo Arribas i David Jantarada, L bideo amostra ls gaiteiros a tocáren an drento de la Dega de l Faustino, adonde fui la proba de binos.
Stubírun alhá tamien outros sendineses, que pagórun de l sou bolso para ajudáren l’eibento i até l bino de la Cooperatiba fui pago, l que amostra que inda hai quien represente Sendin, sien ser cun sbsídios de la Junta ou de la Câmara i sien cobrar geira. Inda hai giente amportante an Sendin i que faç por lebar l sou nome pul mundo. Alhi nun houbo solo comer i bober, mas ua berdadeira açon de markting, bien aporbeitada pul presidente de la Cooperatiba de Sendin. Mas na cultura Sendin tamien stubo presente, La Prof ª. Drª. Catedrática de la Ounibersidade de Vigo, Maria do Carmo Henriquez, falou subre “vinhos i género gramatical”; L Profº. Drº. Antoine S. Baillyl, de la ounibersidade de Genéve que fizo la sue sposiçon subre “vin et sacré”; l secretário perpétuo de la Cunfrarie de vinos gallegos, D. Giuseppe Paussatta, que dicertou subre “la sexualidade de ls binos gallego-stramuntano-dourienses”; L Drº. Franciso Nebro/Amadeu Ferreira, porsor cumbidado de la Ounibersidade Nuoba de Lisboua, que fizo la apresentaçon de la Academia de Letras de Trás-os-Montes i muitos outros.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
