Por todo lado la bendimia ye ua fiesta i para algua giente ye inda un die an que las pessonas cumbíben i púoden ganhar uns euros, que doutro modo yá nun teneríen possiblidade de ganhar. Por cousa de l’arranque de las binhas yá nun hai tanta bendimia cumo noutros tiempos, mas inda hai muita giente que trabalha i bai porduzindo para outros gastáren. Mesmo cun l’arranque de las binhas, la Cooperatiba ten recebido quaije las mesmas ubas, l que amostra bien que la Cooperatiba bai tenendo mais apoio de ls sous associados. Hai ua splicaçon para esto ser possible, será l que mos iran dezir ls respunsábles pula Cooperatiba, nua antrebista que l HOIJE fazerá acabada la campanha.
Pulas anformaçones que tenemos, ls quilos de ubas, este anho, serán mais que ne l’anho passado i la culidade será melhor. Tamien la graduaçon ten sido buona i nun hai porblemas grabes culas ubas. Hai solo un porblema, que ye ser un anho melhor de brancas, que de tintas, porque sabemos bien que l balor de l bino tinto ye muito maior, inda que la Cooperatiba tenga oumentado quaije pal drobo, las bendas de bino branco angarrafado. L buono funcionamento i outomatizaçon de l’antrada de las ubas, faç cun que nien se dé cunta que hai bendimia, mas ténen antrado por die, mais ubas que ne l’anho passado.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
