La parte mais larga de Pertual mide-se zde la raia de l termo desta aldé i l sitio adonde l riu Neiva, ne l Minho, entra ne l mar. Ye la aldé que queda na parte mais ouriental de Pertual, la aldé adonde toda la giente fala mirandés, mas que tamien fala l castelhano, porque fui na antrada de l riu Douro, an Pertual, que se fizo la barraige de l Castro, aldé spanhola i que inda hoije ye cumo ua armana de Paradela. Ye ne l termo de Paradela que acaba la raia seca i ampeça la raia de l rio Douro. Mas l pertués ye tamien la lhéngua de todos porque fui la purmeira lhéngua oufecial i aqueilha cun que daprendírun a ler i a screbir.
L bideo que bos amostramos ye anteressante porque amostra un pouquito de la cultura mirandesa, de que esta tierra ye un museu. Fui eiqui que se ancuntrou ua de las danças mais anti(g)as i mais mirandesas, “L Pingacho”. Era natural de Paradela l tiu Lérias, ua de las pessonas mais coincidas de la musica tradecional mirandesa. Puode parecer que yá se recolhírun todas las musicas i danças de las aldés de l Praino, inda hai muita cousa para daprender, mas cumo dezíen datrás i nunca fui tan berdade cumo agora, essas cousas de canti(g)as, cuntas i fiestas, ye para quando hai tiempo i nun hai que fazer.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão
