Demingo ampeça la nuoba época de futebol ne l que diç respeito a la Associaçon çtrital de Bergáncia (AFB) cun l’ampeço de la taça. Este anho las eiquipas tubírun muita deficuldade an fazer las eiquipas i porparar la nuoba época, porque la crise chegou a todo lado. Yá uns anhos que beniemos alertando para ls gastos eisagerados i para la anfluéncia de la politica ne l çporto. Todo mundo deberie saber que ls políticos solo sáben trabalhar cul denheiro de ls outros i quando hai muito para gastar sien que naide ls pieda cuntas. Agora ampeçou todo a ser çfrente i aparecírun las deficuldades. Mas l G.D.Sendim siempre soubo gerir las cousas i ye de las poucas eiquipas de l çtrito que bai andando, bonda que las outarquies l tráten cumo debe de ser.
La eiquipa deste anho ye buona para l que debe ser l cumportamento de l Sendin durante l campeonato, ten alguns jogadores yá cun spriéncia i l treinador ye l miesmo de l’anho passado, l que trai tranquilidade a la eiquipa. Onte stubimos ne l treino i todo parece porparado para l purmeiro jogo oufecial, que ye acontra l Mirandés para la taça de la AFB. Todos stan cun buntade de ampeçar bien i de iren a Miranda fazer un buono resultado, para apuis ganhar la eileminatória ne l jogo eiqui, an Sendin, ne l campo Valentim Guerra.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
