SENDIN - 2
MIRANDÉS - 1
Ua tarde de Outonho que cumbidaba a ir a ber la bola i inda po riba un SENDIN-MIRANDA . Era la segunda mano de la taça i cumo l Mirandés habie ganhado por 2-0, na purmeira mano, era possible l Sendin seguir adelantre. Cheguemos un minuto atrasados i yá nun fui possible tirar ls retratos de l’antrada de las eiquipas, mas de la puorta bimos l purmeiro golo i fui de l Sendin.
Purmeiro golo de l Sendin
L Sendin ampeçou bien l jogo i lougo al purmeiro minuto marcou, l que fazie la giente acraditar que era possible ganhar i passar a la eileminatória seguinte, l Mirandés acusou l golo i l Sendin stubo mesmo po riba ne ls purmeiros minutos de l jogo.
L Sendin staba po riba
Mas quando las cousas se tórnan fáceles, facelítan-se las cousas i alguns jogadores de l Sendin ampeçórun a pensar que éran ls melhores i a ser andebidualistas squecendo-se que l Mirandés ten buona eiquipa i quando se dórun cunta stában ampatados.
Golo de l Mirandés
L golo de l Mirandés zanimou la giente
L Mirandés a seguir al golo eiquelibrou l jogo i la purmeira parte acabou cul ampate de 1-1 . Na segunda parte l jogo perdiu culidade i l Mirandés, sabendo que l Sendin precisaba de marcar 3 golos fui deixando andar i l Sendin acabou por marcar l 2-1 , mas que de nada baliu, porque l Mirandés sigue adelantre na taça, que ganhou na última época.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
