Las scuolas de Sendin i Palaçuolo fazírun hoije l magusto cumo ye hábito tols anhos. Ye siempre un die de fiesta i cumbibio antre porsores, alunos i antidades oufeciales de la Junta de Freguesie i Cámara Munecipal. La Cooperatiba tamien partecipa siempre i ls porsores, ténen la ouportunidade de porbar l bino nuobo.
Antes de l’almuorço adonde se come siempre la marrana assada i las sardinas, houbo la manhana çportiba cun pruobas de corta-mato para todas las eidades, por las rues de la bila i alredror de l ciclo. Las castanhas son l percipal i apuis de las coméren, nun falta la aquestumbrada anfarruscadela antre ls garotos, que aporbéitan tamien para tisnar ls porsores i porsoras menos atentos.
LHEMBRÁNCIAS
Este ye mais un retrato de la staçon quando inda era cousa que se bisse, inda l cais staba anteiro i ls bagones de mercadories arrumában para çcargar. Quando se fala tanto an assacar respunsablidades por la mala geston, cuido que ye hora de tamien eiqui, tornarmos a preguntar porque se deixou stragar la staçon i quien son ls culpados. Star ne ls cargos políticos solo para gastar l nuosso denheiro sien prestar cuntas, yá bonda.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
