Tamien an Bergáncia, las scuolas comemorórun l San Martino i nas scuolas de la Sé fui ua fiesta adonde partecipórun tamien ls pais de ls alunos. Ls porsores, ampregados i alunos, aprobeitórun l’eibento para fazéren na scuola ua feira de sabores tenendo cumo tema las castanhas. Muitas cumpotas i doces de castanha, muitos ambentados agora, deliciórun la comunidade scuolar i quedarán ne ls libros para outros d’aprendéren i fazéren an casa.
La partecipaçon de ls pais nas atibidades scuolares debe ser ua prática a seguir an todas las scuolas i este bideo amostra cumo esso fui i ye amportante.
L San Martino debe ser aprobeitado para pormober la castanha que yá ye ua de las percipales culturas de Trás-ls-montes i ua riqueza para ls agricultores. Fazer un magusto yá bai a ser mais fácele porque yá hai ua fábrica que porpara las castanhas yá assadas, para bender. Bonda aquecé-las ne l micro ondas ou nua panela para stáren prontas a comer.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
