Todos sabemos ls porblemas que quando neba, muito mos aparécen pula frente i hai que prebenir, arranjando las cousas para quando chegar l tiempo, starmos porparados. La Cámara de Bergáncia reforçou ls meios i cumprou nuobos carros i alguas toneladas de sal para que ne ls dies de maiores nebadas, steia todo porparado para limpar las rues i las stradas i la giente poder andar i fazer la sue bida normal.
Puode parecer que estas cousas nun son assi tan malas, mas inda hai muita aldé pul çtrito i mesmo ne l Praino, que poderán quedar eisoladas cula niebe i anton quando hai giladas fuortes, nun se puode andar pulas rues. Este ye un eisemplo de cumo se debe prebenir la chegada de l’Eimbierno. Fumos a saber i l sal era de las minas, apropiado i buono para l’ambiente. Fazimos esto, porque yá bimos botar sal de curar ls cochinos nas rues i muita giente oube falar que l sal ye buono para l gelo i bótan-lo junto a las sues casas. Era amportante que se çponiblizasse sal de las minas para quien l quejisse i precisasse.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
