Rializa-se ne l próssimo die 2 de Dezembre, a las 21 horas, ne l Ouditório Municipal de Miranda de l Douro ua sesson de dibulgaçon “Dinamizaçon de las Zonas Rurales”. Esta ye ua ouportunidade para quedar a coincer alguas de las medidas de l PRODER i las nuobas candidaturas d'apoio pa la dinamizaçon de las zonas rurales. De referir, qu'estas medidas se çtínan a pessonas singulares, coletibas, IPSS, outarquies, associaçones, etc. Quanto al ambestimiento, este puode ser diberso, zde sploraçones agrícolas, turismo rural, criaçon de microampresas, atebidades turísticas i de lazer, recostruçon de fachadas, serbícios d'apoio a l'anfáncia, acumpanhamiento domiceliairo a eidosos i deficientes i serbícios eitinerantes d'apoio social, serbícios d'animaçon cultural i recreatiba de base local, serbícios d'apoio a nuobos residentes, etc.
18 de Dezembre ye la data pa l'apersentaçon de l libro “Dário de ls Anfiéles” de João Morgado an Miranda de l Douro, a las 16 horas, ne l Salon Nobre de l'outarquia mirandesa. Este ye un libro de bibéncias reales guardadas i sofridas an segredo na alma de ls personaiges i colocadas agora a znudo pulas manos de mestre que permite soltar todos ls gritos abafados pula bergonha, pula tristeza i pul sofrimiento. Ua obra direta, simples i eirresistible!
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
