Apuis de ua manhana de sol, l cielo ampeçou a quedar ambaciado i sien se dar por eilha la niebe ampeçou a caer, purmeiro mansamente, cumo que a apalpar terreno para saber se podie tomar cunta de todo i cumo naide se queixou debrebe acupou telhados, rues, campos i até las gorras i cabeças de ls mais çcuidados. Cumo era la purmeira deste Outonho i cumo staba buono de ber l HOIJE fui a filmar todo.
Stabamos a ber ls trabalhos ne ls postes de alta tenson, trabalho bien defícele i que muito mos fizo pensar de l que era d’atrás la tropa, adonde se fazíen eisercícios, que pouco sentido mos parecie fazéren, mas que alhi bimos séren bien neçairos para ls trabalhadores. Andar an riba de postes tan altos i gatinhar puls filos, uas bezes nas alturas, outras mais abaixo, mas todos a eisigir muita hablidade de quien trabalha, debe ser bien recumpensado. Será que fazer uns bersos ye mais amportante?
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
