Ye un registro que quedará para siempre, la purmeira beç que caiu niebe ne l IC5 an tierras de Miranda. Son de l IC5 junto a la antiga staçon de camino de fierro de Sendin, ls retratos que ponemos hoije. Nun fui grande la nebada que caíu onte a la nuite i hoije de madrugada, cumo acunteciu an outras regiones, mas dou para ber niebe pula purmeira beç ne l IC5. Ls carros podírun andar pulas stradas de l cunceilho i nun ancerrórun las scuolas.
Ls trabalhos de l IC5 cuntinórun durante todo l die i mesmo ls trabalhos ne ls postes de alta tenson tamien. L retrato que bos amostramos arriba até dan grima, al ber na punta de riba dous homes, nun die de niebe i tan friu cumo staba hoije.
Para acabar cun la crise, son amportantes estes eisemplos, solo ye pena que ls nuossos gobernantes nun sában gastar bien l que estes homes gánhan cul sou trabalho tan duro i defícele.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
