DIE DE REIS
Ls reis siempre se cantórun an Sendin i cun mais ó menos giente la tradiçon nunca morriu. La Dega de tiu Almendra fui sitio de ir a comer ls reis zde que alhi se fizo bino i esso passa-se hai mais de 60 anhos.
Zde que passou a casa rural, ls reis passórun a tener la bejita de un grupo de Miranda, que tubo la sue ourige ne l “Quinteto de ls Reis 84” .
Fazimos parte de bárias geraçones de grupos que íban a cantar ls reis pulas rues de Sendin, bejitando las casas de ls cantadores, acabando a comer ls reis ne l mardomo de l anho.
Sta-se a fazer rebibir la tradiçon i este anho yá se ajuntórun ls filhos i nietos de muitos de ls que yá nun stan antre nós, mas que cuntínan na nuossa mimória.
Stamos a fazer toda la stória porque la cultura ten que tener raízes fuortes para melhor poder bibir.
Este anho yá se cunseguiu fazer renacer ua nuoba cantiga de ls reis, que ye miesmo sendinesa. L grupo yá la eira a grabar i Mário Correia le dará pousada ne l Centro de Música Tradicional.
