RONDA PULAS RUES DE SENDIN A CANTAR LS REIS
Apuis de la cena de l die de reis na casa rural de tiu Almendra, l grupo de Miranda quijo fazer ua ronda pulas rues de Sendin i ye dessa ronda l bideo que bos amostramos. Ne l Sagrado bejitórun la Grabiela i apuis fúrun a ber la casa rural de tiu Pino, que drento de un anho yá recebirá ls cantadores i l grupo de Miranda, nua cena de reis ó de outro die nomeado que sirba para ls lhebar alhá.
Cumo miesmo acerquita stá la casa rural de la Tenerie , pus ala a tocar a la puorta a ber se dában ua sede de bino i algo para dar al diente. La puorta abriu-se i la bejita fui curtia porque habie que ir a la ronda, mas dou para desear un Bun Anho i porbar l bino.
Pulas rues la giente arrumaba-se a ber i oubir, a las puotas i jinelas tamien nun faltou quien se assomasse a spreitar i a lhembrar tiempos antigos que hai que fazer rebibir, porque solo hai ua bida i esta ten que se bibir sien se pensar solo ne l parecer i tener, mas mais ne l bibir i ser.
