Demingo de Ramos, apuis de la missa, houbo cunceilho que ye ua de las tradiçones mais amportantes que se manténen an Sendin. L persidente de la Junta, cumo antigamente fazie l regedor, chube-se na cruç de l adro de la eigreija i dalhi fala al pobo subre ls porblemas que dízen respeito a todos.
L persidente a falar
Cumo era Demingo de Ramos staba muita giente i l persidente nun se squeciu de desear buona Páscoa a toda la giente. Dou bárias anformaçones i cumbidou toda la giente a ir a la cena de ls caçadores.
La giente a scuitar cun todo l atento
Nestas oucasiones tamien las pessonas fálan de ls porblemas que quíeren ber resolbidos i antre todos, tamien se fala de muita cousa. Este ye un sitio onde se pratica la democracie i onde se daprende a bibir an comunidade.
Nun ye un berdadeiro eisercício democrático?
Mas nin todas las nuobas fúrun buonas, un ampreiteiro scachou la cruç que stá an frente de l semitério, nun fui por querer, mas por falta de cuidado al passar cun ua grua. Agora bamos a ber cumo se bai a fazer outra.
Cumo quedou la cruç
Parece que la quíeren poner cumo staba, colando todo, speremos que quede bien.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
