Muito tenie hoije que cuntar subre las tradiçones de la Páscua, mas la lembrancia de la Páscua de quando you era pequeinho i de l que hoije pude ber, ten muito de parecido, yá que las tradiçones inda se ban mantenendo por Sendin.
La Páscua siempre fui ua fiesta de la comunidade. Apuis de un tiempo de aiuno, era tiempo de comer i l folar era l rei de la comida.
La massa de l folar
Por toda la tierra de Miranda, l pan i l cochino eran la base de toda la comida i cumo era tiempo de fiesta i de acabar cun l aiuno, tenie que ser cun algua cousa special. Fui assi que ambentórun l folar. Ua cousa que tenie pan i cochino i que parecie un doce – l folar .
L forno cheno
Ye agradable lembrar l tiempo an que las nuossas mais i las nuossas abós fazien l folar. Era un die an que se ajuntában las bezinas, ne l forno de ua deilhas ou ne l forno de la rue, para fazéren l folar. Nesse die nun faltában tamien ls roscos, ls doces tradicionales i la bolha doce.
Hoije inda bai sendo assi an alguas rues.
L mie rue atrancada
Outra de las tradiçones que se manten ye la de atrancar las rues, na nuite de Sábado para Demingo. Ls rapazes cumo quando you era moço, cuntinan a atrancar las rues i las puortas de las rapazas para nun íren a tiempo a la percion de la ressurreiçon.
Por bezes hai eisageros, mas la mocidade ten l sou lado buono i malo cumo an todo.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
