Porsores, doutores, lenguistas i curgidosos (cumo ls barbeiros que d’atrás arrincában dientes), todos dan reitólicas i fázen leis de cumo se debe screbir l mirandés i l sendinés.
La scrita solo ten sentido, se serbir para las pessonas melhor se antendéren i nó para uns poucos queréren poner-se an riba de ls outros, cun l sou ar de scritores de pantominas que naide lei.
Sendin bisto d’abion
L mirandés i l sendinés rejistírun i cuntinan a falar-se porque houbo quien quedasse porqui a falar-lo i nó porque ua cumbençon ou un doutor feito an Francia, cumo esse que se doutorou cun binte balores, por aqueilho que el diç, mos bénen dezir cumo se diç ou scribe.
L mesmo se puode dezir de ls que daprendírun hai dous dies a screbir i stubírun dúzias de anhos sin l falar i bénen hoije a creticar ls que nacírun i se criórun a falar-lo.
Retrato de Paulo Magalhães
Nós sendineses, nun debemos deixar de screbir i falar cumo daprendimos zde pequeinhos. I nun mos debemos amportar muito, cun esso de ls assentos, nin de ls erros. Por un assento perden tiempo ls lenguistas i ls anteletuales na çcuçon de l acordo ourtográfico de l pertués. Gánhan bunos ourdenados para tenéren tiempo para essas cousas.
Libro para lerdes
Toca de screbir sin miedo. I yá agora, mais ua splicaçon:
Al ditongo mirandés “ uo” corresponde an sendinés “ u”.
Mirandés: -nuosso -puonte -fuonte -puorta -buono
Sendinés: -nusso -punte -funte -purta -buno
No Porto diç-se puorta i scribe-se porta.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
