La chuba nun deixou que se fazisse, cumo staba marcada, la caminada zde Sendin a la capielha de San Paulo passando puls Santos. Un pequeinho grupo acabou por ir, mas nun bou a scebir subre la caminada porque desso se ancargou l porsor de mirandés, Amadeu Ferreira, que tamien fui. L testo bai a Salir ne l SAL, un die destes, cun ls retratos.
L tiempo nun staba nada buno
Cumo chobie bastante quedemos algun tiempo a falar de todo i de nada, mas cumo las cumbersas siempre dan para algua cousa, dou-mos para ir fazer ua caminada por las rues de Sendin i besitar alguns sítios que cada un iba dezindo ser anteressante.
Por las rues de Sendin
Tamien falemos de la nuossa léngua i cumo teniemos antre nós l maior specialista an léngua mirandesa i aquel que mais ten feito por eilha i inda por riba era nuosso, era sendinés, nun deixemos de aporbeutar l porsor Amadeu Ferreira i oubir un cachico de l muito que el sabe.
Na fráuga de tiu Marchacan
Mas el nun sabe solo falar, sabe tamien oubir i a todos oubie cumo se porsores fússen tamien. Ye esto que nós sendineses tenemos que fazer, falar sin miedo, mas oubir tamien ls outros. Yá mais que ua beç tengo screbido subre la necidade de deixar de dar bocas al mundo. Se nun somos nós a defender-mos, quien l bai a fazer?
Ls sendineses a falar de la sue tierra
Onte falei de la léngua i dixe-bos para ler un libro, débeis fazer-lo i cumparar-lo cun l que scribe l nuosso porsor Amadeu. Cada un ten l sou balor, mas hai que recoincer que l coraçon de l mirandés screbido, stá an Sendin.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
