Este ye l die nomeado que mais diç a todos ls trabalhadores. Ne l anho de 1886, 500 000 trabalhadores salírun a las rues, an Chicago, na América eisegindo, solo 8 horas de trabalho, por die. La policia batiu ne ls trabalhadores, mas eilhes nun zistírun i la luta cuntinou, mesmo apuis de muitos séren presos i julgados.
An 1889 l Cungresso Ouperário Anternacional decretou que l die 1º. De Maio passarie a ser un die de luto i de luta para todos ls trabalhadores, an todo l Mundo. An Pertual solo chegou la libardade de comemorar este die, apuis de l 25 de Abril de 1974.
La manifestaçon de 1886, an Chicago
Ye ua pena que inda hoije an Pertual, haba giente que nun comemora l 1º. De Maio. I nun se trata de partidos, nin de eideologies, mas de falta de solidariedade. Inda somos eigoistas i nun mos amportamos cun ls outros. Mas nun ye de ademirar, quando las pessonas responsábles solo míran para eilhas i para ls que le angraixan las botas. Las botas cun que ban die a die ancalcando ls outros.
Las maias
Mas l die 1º. De Maio ye temien l die de las maias, que para uns son las froles de las scobas amarielhas i que questúman poner nas puortas, para librar la giente de las carraças i de l malo oulhado. I para outros son las castanhas, que se guardórun de l’outro anho i que cada un debe comer para nun tener delor de cabeça.
Las castanhas
Fui para l campo a apanhar uas poucas de scobas i iba robendo uas castanhas, quando ancuntrei un grupo de alunos de las scuolas de Alcochete, que benírun a passar uns dies porqui.
Ls alunos de la scuola de Alcochete
Quejírun oubir falar mirandés i quedórun cuntentos de me oubir. Tamien gustórun de las froles mirandesas. de l campo.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
