Puode parecer stranho l títalo de la nuoba d’hoije, mas para mi ye l nome mais apropiado. Nesto de la scrita hai muita oupenion i muito studo i anton por parte de ls lenguistas inda mais. You gusto muito i respeito muito l sou trabalho, mas mais para tirar las dúbidas de cumo se dében screbir las palabras ou para saber la ourige deilhas i até para se saber donde nacírun las lénguas i cumo se formórun.
L jogo
Mas eilhes que me scúlpen, mas antes deilhes habie i hai las pessonas, que por necidade ténen que falar i para esso ténen que poner ls nomes a las cousas. L jogo que hoije ls moços i moças de Sendin jogórun, para mie, ye pingue-pongue, até porque la bola bai dun lado para l outro i faç mesmo l barulho de la áuga a caer, pingue-pongue. Parece ua boteira a pingar sin parar.
EBI de Sendin contra l Coleijo de Torre D. Chama
Ls campeonatos scolares son de bários jogos i antre bárias scolas, hoije fui l jogo antre la EBI de Sendin i l Coleijo de Torre D. Chama. Ls nuossos moços nun puoden ser ls melhores an todo i nesto de l pingue-pongue se las moças ganhórun, ls moços nó. Neste jogo hai jogos de un contra un i tamien de pares.
Las nuossas moças i las de la Torre, nun jogo de pares
Nestas cousas you gusto siempre de falar cun ls moços i moças de las scuolas i cun ls porsores. I ten dado resultado, yá que ban criando blogs i ban trocando de retratos antre eilhes i até la amizade queda para alhá de l jogo. Ls porsores tamien ajúdan i gústan de l HOIJE i móstran anteresse por l mirandés.
Mais un retrato de l jogo
Este jogo tubo algo de special i que me deixou cuntento i bieno dar rezon al que screbi onte.
Para se ser coincido solo ye perciso trabalhar i ser amigo. L porsor responsáble por ls alunos de l Coleijo de Torre D. Chama era un sendinés i fui bien recebido por todos. Ne l jogo apoiou i bien ls sous alunos, mas cumo sendinés staba feliç, na sue tierra, era l porsor Sérgio Quitério i nun se bai a squecer de ir ber l Hoije.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
