Onte, an Carrazeda, l Sendin fizo l último jogo deste anho i cunseguiu fazer ls últimos 6 jogos sien perder. Se nun fura l percípio de l campeonato, an que l Sendin, cun ua eiquipa de moços i que por falta de spiencia perdiu dous ou três jogos, tenerie quedado ne ls purmeiros lugares, assi i todo quedou bien classeficado.
Era mesmo l último jogo
L jogo por bias de l atraso de l árbito, ampeçou tarde i ls jogadores parecíen cun pouca gana de jogar. Passórun la maior parte de l tiempo a mirar para la bola. L Sendin cumo eiquipa mais spriente iba mandando ne l jogo, mas l Carrazeda cumo jogaba an casa l último jogo, nun querie perder.
L Carrazeda tentaba jogar
L Sendin cumo melhor eiquipa i cun jogadores cun mais hablidade jogaba cun calma a la spera de uns cuido de l Carrazeda para marcar i ganhar l jogo cun facelidade, mas ls jogadores de l Carrazeda, siempre un jogador de l Sendin tenie la bola, lougo l arrodeában para nun l deixáren fazer hablidades.
L jogador de l Sendin arrodeado puls de Carrazeda
No fin l resultado fui:
Carrazeda – 2
Sendin – 2
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
