Ye ua ambora que tengo que dar mais bezes i cun mais amportancia, para que se saba que ls sendineses son muitos i amportantes, por toda la parte de l mundo. Muitas bezes nun sabemos dar l balor a la giente de Sendin i debiemos tener ourgulho. Por muito amportante que ua pessona seia, hai siempre outra inda mais. Nun podemos mirar solo para la nuossa barriga i ber l nuosso umbelhigo.
Soutro die an Bregancia
Un de ls sítios onde hai mais sendineses ye an Bregancia, uns a studar, outros a trabalhar i outros a mandar tamien.
Ls sendineses onde se ancóntran sáben ser amigos i nas oucasiones mais cumplicadas, stan siempre prontos para ajudar. Ye cierto que hai eiceciones, cumo an todas las cousas, mas nun ye cumo muitos quieren fazer crer. Por Sendin naide se nega.
Este quadro diç todo
Cumo hai muitos sendineses, an Bregancia, todos ls anhos fázen un cumbíbio i un jantar de ls que stan alhá a trabalhar i a bibir ou a studar. Cumo la amizade i la buona cumbibencia de ls sendineses, cun giente de Bregancia, ye buona, faç cun que todos ls anhos haba jogadores de Bregancia, que bénen por dues cascas d’alho a jogar por Sendin.
L cumbibio fui ne l café dun desses jogadores
Mas querie dar a coincer alguas de las atibidades i lugares mais amportantes que oucupan ls sendineses. Studantes, angenheiros, doutores, anfermeiros, ampreiteiros, radiologistas, comerciantes, directores de serbicio de la Segurancia Social i de l Centro d’Euducacion Special, l Gobernador Cebil, l Director de l Centro de Amprego i l bice-presidente de la Region de Turismo. Nun falo an nomes d’apropósito, para que todo l sendinés, que nun ye ambejoso, baia a saber. You puodo dezir ua berdade, son mesmo sendineses i amigos de la nuossa tierra.
Ls mais moços
Al cumbibio fúrun tamien alguns que stan a bibir acá. Cumo bedes Sendin i ls sendineses son mais i mais amportantes que muitos pénsan. Para se ser sendinés i amportante, nun ye perciso andar a agabar-se ou apegado als outros, cumo las carraças als perros. Chega ser sendinés de coraçon, trabalhar por sendin i quedar cuntento cun l bien de todos.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
