Ls meses de Abril i Maio son de ls mais amportantes para la agricultura, puode-se dezir que son la chabe para todo l anho. L campo cubre-se de froles de todas las quelores i l cielo apimpona-se cun paixaros de ls mais bariados, de maripousas i abeilhas, ye tiempo de Primabera.
L campo cubre-se de froles
Mas para séren meses buonos tamien ten que chuber, ua chuba bien chubida , cumo diç la giente. Yá dezíen ls bielhos:
- Chuba-me a mi Abril i Maio i a ti todo l anho…
Ye l tiempo de porparar ls huortos i hai que ampeçar a poner las patatas de scadal. Las perdizes chócan ls uobos i ándan mansicas.
Las perdizes ándan mansicas
La chuba de la ultima semana fui buona i al mesmo tiempo nun gelou i se assi cuntinar mais uns dies yá l anho ben buono. L die 25 fui l die de San Marcos i dezien tamien ls bielhos:
- Las geladas de San Marcos son malas para las binhas, para la frol de l centeno i para las brebas. Quando hai geladas neste tiempo, ben San Marcos i bota las brebas abaixo, de nuite, cun ua bara. Se nun gelar, por la Santa Cruç (3 de Maio) yá la binha reluç.
Las binhas ban arrebentadas
An Cunstantin dezíen que se chubisse ne l die de San Marcos, l santo, ganhaba un touro. La chuba, nesta última semana, era tan neçaira i buona que dezíen:
- Se chuber an San Marcos,
Sembra tou lino,
Nos altos I ne ls baixos.
Inda habie lino nesse tiempo.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
